Dr. Elizma van der Smit clinical psychologist                      

MY VRIENDIN MISBRUIK MY

Deur Elizma van der Smit    B.A., B.A. Honns.,M.A. Klin. Psig. (PU vir CHO), M.Phill (PPL) (RAU)

(Geskryf vir 'My Dilemma', in Sarie / Sarie Gesond)

 

Liewe leser, oorweeg die volgende vrae indien jy onseker oor jou vriendskap is:

Hoe voel jy gewoonlik nadat jy tyd met haar spandeer het?  Voel jy soms  rustig en positief of voel jy meesal gedreineer en teleurgesteld in haar?  Almal gaan deur moelike tye, maar is hierdie die normale patroon in jul vriendskap?

• Is jou vriendin ‘n positiewe invloed in jou lewe en ondersteun sy jou in wat vir jou belangrik is – insluitende jou verhouding met jou verloofde?
• Hoe voel jy indien jy ‘n ruk lank nie kontak met haar gehad het nie (soos byvoorbeeld wanneer jy weg was met vakansie?  Voel jy hartseer en kan jy nie wag om verlore tyd in te haal nie of voel jy eintlik meer skuldig en miskien verlig?
• Kom die vriendskap van altwee kante af, of is dit meer jy wat die verhouding in stand hou?
• Is dit soms jou beurt?  Toegegee, geen  vriendskap is altyd 50/50 nie maar is die verhouding altyd in haar guns?
• Voel jy gemaklik om die goeie oomblike in jou lewe met haar deel en weet jy dat sy bly gaan wees vir jou part?  Of veroorsaak dit meesal dat sy haarself jammer kry eerder as om saam met jou bly te wees?

 

Indien jou jy bevestigend moes antwoord op die meeste van die vrae, moet jy aan jouself erken dat jy met ‘n giftige vriendskap te doen het.  ‘n Vriendskap is giftig wanneer ‘n persoon meer moeite is as wat die vriendskap werd is.

 

Vra jouself af hoe jy in die eerste instansie in hierdie vriendskap beland het:

 

1.  Hou jy daarvan as mense jou nodig het?
2. Voel jy dalk dat jy nie ‘n beter, gesonder vriendskap verdien nie?
3. Fokus jy dalk so op haar probleme sodat jy gerieflikheidshalwe nie na jou eie dinge hoef te kyk nie?

 

Jy is tien teen een ‘n baie goeie mens wat nooit iemand wil seermaak nie maar weet dit beter is om giftige vriendinne uit jou lewe te sny.  Begin deur solank jou tydjies met haar te verkort. Probeer om nie dadelik te spring as sy jou nodig het nie, sy moet self leer om haar probleme te hanteer.  Maak ‘n punt daarvan om te fokus op die positiewe dinge in jou lewe – veral jou verhouding.  Laastens maak seker dat jy ook aan jou eie probleme en drome aandag gee!